信心媽再次發揮「窮遊」本色，發掘平靚正地方，今次再去九龍灣MegaBox的宜家Smaland，上次一拖二帶佢地黎，今次同埋爸爸，趁心心勉強還是120cm，來「最後一次」！九龍灣的Smaland比沙田的大，上次黎每節有45分鐘(唔通因為平日？)，今次只有30分鐘，父母不能進去，只限90-120cm的小朋友，每節名額有限，所以真係要早黎呀！佢開10:30，10分鐘前開始接受報名，我地今日黎到時間剛好！順利報到10:30的session，送佢地入去之後就可以享受一會兒的寧靜！這裡除了波波池，仲有各式的玩具、油顏色等，小朋友都玩得開心的！最重要係免費呀！
明明應該可以玩到11點的，但職員於10:55已經叫小朋友坐定等家長黎接，浪費了五分鐘的遊玩時間。出來之後，剛好11:05又可以報12:00的session，於是信心媽幫手排定隊再報一節，山長水遠黎到，無理由玩一次咁少嘛！
又講下個報名機制，今次黎又同上次唔同喎，上次係有部機禁票排隊的，所以好快已經排到下午的session，亦由於攞票時間同玩樂時間相距太遠，因此容易出現空缺，咁佢就有後備機制，可以在出面排隊等後備入去，我們上次也是因後備機制而成功玩多次！今次又唔同玩法，一開始已經無開部攞票機，係埋去人手報名，而佢亦好清楚寫住幾點可以報邊個session，我亦見唔到有冇得後補。各有各好啦！總之秘訣就係，早到可以玩的機會越高！越晏過來只會越多人。
成功排到12:00之後，我地就在商場先行下，去左九樓另一個免費遊樂區「童真天地」，簡單的滑梯、模擬車、電子投射影像、小屋子等，已經又可以消磨大半小時！
玩完呢度行番出去，經過有間好似冒險樂園的東西，我當然唔係比錢去買，讓佢地摸摸看看然後就叫走啦！還未夠鐘番去，帶老公入左去「九五茶座」，之前上網見到話呢間嘢$200全日任玩拋彩虹同夾公仔，我以為只有這兩樣所以無咩興趣去，不過老公去視察完後話，其實都多嘢玩喎！言下之意就係佢想玩囉！
呢間「九五茶座」本身係遊樂場加餐廳，充滿懷舊色彩，就算唔黎玩同食嘢，黎影下相都幾得意的！由於今日係為左食「火車壽司」而來的，所以就沒有幫襯這餐廳，不過嘢食唔算貴，裡面仲好多位坐，如果小朋友大少少，可以等佢地自己去狂玩，家長們坐餐廳裡吃喝休息也是不錯！
時間差不多，又坐lift落番4樓去Smaland玩多轉！今次送佢地入去後，我和信心之父立即番「九五茶座」買張$200任玩咭自己玩番幾轉先！不過買左咭就發覺有少少伏，因為到真正想玩時，先發現部份機係壞的，可能「入左錢」但玩唔到，有些直情開唔到...而夾糖機裡面的糖果/寶石數目亦比較少，好難夾，夾公仔部份物件太大，根本難以夾到...
由於只有半小時，我地好快玩個圈就要落去接信心二人，但爸爸玩到唔捨得走，結果係我去湊佢地回來！12:30剛好到食飯時間，我地就去「九井壽司」！話說兩姐弟近來愛上睇「新幹線戰士」卡通片，細佬一向愛車，而家更愛火車！所以專登帶佢地黎食新幹線壽司！我知好似元氣都有部份分店用火車送壽司，不過呢間仲有免費玩具送比小朋友，所以我來了！
頭先11:30已經BOOK左位，不過都唔滿座。門口除了免費玩具，還有一些圖書比小朋友可以借來睇，仲要係Thomas！信信超開心呢！心心選了一個好似風扇cover的東西，(但臨走見到多了My little pony的小袋，於是又換了)，而信信就揀左張貼紙，都幾靚！另外仲有些男仔玩既咭可以選。
坐低後就睇下有咩食啦！兒童餐有三款，其中一款係用火車盤來載食物，信信當然揀這款「特急-九井號」($58)！但奇怪的是，兒童餐唔知點解有花之戀，有三文魚刺身？小朋友點食呢？除此以外，得一舊腐皮粟米壽司、兩舊天婦羅、兩條春卷、幾條蛋絲同最重要的，一杯雪糕！賣相當然靚啦！仲有把遮仔！對小朋友來說，已經足夠，好開心！
心心唔要兒童餐，要食壽司，選了些熟食的壽司，例如玉子壽司、蟹柳小卷、粟米沙律手卷等。正當我諗緊食咩之際，見到三文魚籽海膽迷仔丼做半價，所以二話不說即點！呢度全部用電子下單，過一陣D壽司好快就由新幹線送到，好開心架！不過佢有些壽司又只係普通咁送，唔知係咪因為架車未返到廠呢！哈哈！
第一次一家四口咁開心食壽司！加一後盛惠$354.2！都唔算貴呀！食飽飽在門口再影相然後又去九五餐廳玩了！我地一張咭四個人用，其實都好抵，張咭裡面本身有二千個幣，我地玩左差不多兩個鐘其實都未用得哂！食完飯回來已經見到多人左好多！所以都話越早越好！不少機都要排隊玩，拋彩虹又係一條隊，埋到去佢會比一個杯子的銀幣你，就不停拋囉，原來可以無限拋都幾開心的！只可惜排一次都要相當時間，我地前後排左兩次，細佬勁呀！換到兩個小禮物！
現場除了夾公仔，最多就是拋波遊戲，包括BB拋波機、兒童籃球機同成人籃球機，而三者的同樣問題都係D波會拋都唔見哂！不過當我同D職員講既時間，佢都好快就幫我揾番D波可以重新開機玩！
轉眼間已經4點，玩完呢度就落五樓睇下呢期同海洋公園合作的STEAM探索號，Megabox係每期都有不同主題的，上次黎呢度睇左恐龍，今次有一隻小船介紹下保護海洋咁，又排隊玩左一樣免費活動，雖然有點無聊。另外，因為我地消費了兩次$200以上，可以選擇玩遊戲或抽扭蛋，信心二人都選後者，點知抽時才留意到要電子消費，由於爸爸買九五餐廳的任玩咭用了現金，所以少了個抽獎機會。大家下次去要留意啦！兩個細路得一次抽扭蛋，當然又要爭一下，扭到張餐廳優惠卷，大家都無興趣！哈哈！
玩左大半日，係時候回去了！今日只用了五百幾蚊，但好似玩左好多，食得唔錯！大滿足呀！
P.S.本身無諗住玩九五餐廳諗住早D食完飯就離開Megabox，行15分鐘就會去到「九龍灣公園」，都係免費玩意呀！大家下次可以考慮吓！
沒有留言:
張貼留言