跟住我地跟實酒店職員指引，由酒店經地下街行去JR札幌站，在地下街就好好行，我諗我地行左20分鐘左右掛，就到達JR站。其實由札幌通往小樽的火車班次都好密，中間部份係特快列車，價錢都一樣的，但好似我地咁，等得架特快黎其實我坐普通車都差不多時間到，就毋須特登等，印象中好似係快20幾分鐘，咁我覺得慢車都無咩問題，都係一小時內到，等我地好好感受下都好呀！售票處有個姐姐現場幫助旅客，在她的幫助下我地都好順利買到車票，然後去月台等車，不過竟然全部都樓梯？！我地要搬架BB車上去囉....日本JR有分指定座位同非定座位的車卡，指定座位就貴D囉，但肯定有個位係你，唔怕無位坐，但我地估呢個非繁忙時間都唔多人，所以只買非指定座位的車票，結果都順利有位坐呀！車箱大同小異，期間我不斷提醒同行既姑姐同心心兩個講野細聲D，不過依然都係....經過幾個站，好快見到大海，亦好快到了小樽站！話說，信心媽咁想去北海道，都係因為當年睇左《情書》呢個戲，有睇呢套戲既人都知，一定要黎小樽同整玻璃啦！原本我想冬天先黎玩雪，襯番套戲既背景，但無奈今次時間唔啱，又唔知下次幾時先黎，所以點都黎還左個心願先！
 |
| JR上 |
 |
| 小樽站 |
一出小樽站，其實感覺一點都不浪漫，哈哈！就是一個小城市囉！民宿的主人在車站外接我地，由於6個人佢一架車車咁哂，我地就另外坐的士跟住佢架車返民宿，其實由車站行去民宿都係12分鐘左右。呢間民宿是經AirBnB訂的，我第一次用，感覺OK呀，價格也抵，住一晚一千蚊都不用(扣起了我迎新價惠二百幾蚊)，6個人喎，平過酒店囉，但成間屋咁一齊住，我鍾意！又有兩間房，剛好FIT我地需要。之前見人地既評價都話屋主好好，事實都係呀，其實我地未夠鐘CHECK IN，但佢比我地黎放下行李，開門前講左N次解釋話未清潔，當然我地唔介意的。入到屋，佢介紹一輪所有設施(冷氣、雪櫃、簡單煮食用品、洗衣機等一應俱全！)，跟住又同我地介紹行程，教我地可以去邊度玩、有咩好食！仲話明天車我地去租車公司，所以如果大家會去小樽又想住bnb，我都推介呢間呀！
 |
| 期間有名「旅客」猛話心心KAWAII要影佢相....食完飯行街又碰到佢，又影多次，好搞笑... |
 |
| 旅遊書介紹的食，一定認得，但太多人 |
入到三角市場，行左一陣，地方唔大，D路有少少高低不平，推住BB車都少少難行但都行到，好快就黎到旅遊書推介的那間食店，大排長隊登記了至少要等一小時！！當然唔等啦！於是我們去了隔離的那間，剛好有位，就坐下了，入門口的一刻發現細佬竟然坐住車訓！YEAH！我有餐安樂茶食飯了！左望右望終於點了一客三文魚定食比心心、另外叫了魚生飯、海膽飯、八角魚刺身....餐廳都好多人，所以落單以至上菜都要等一陣。終於有得食了！雖然我地只係求其搵間坐低，但都已經好好食了！食左咁多野，盛惠YEN11450!!!即係$800都唔洗？太抵了吧？！
 |
| 八角魚刺身 |
食飯期間有個小朋友話要去廁所！呢D魚市場既廁所要開大都真係相當呢hea....但都無計，照去，但去到真係出乎我意料之外，相當乾淨呢…日本果然係唔同D！不過大小姐去到之後又話唔急了....參觀完廁所又回到繼續食，仲打包左少少野比細佬醒左之後食，臨食再逛下D鋪頭，老公買了一包元貝孝敬老爷，1KG一包好似原價一萬YEN，成功講價減一千再送了少少試食東西.
離開三角市場後我地就向小樽運河進發，途經嘉年華慶典街道又周圍睇下，又買左D街頭小食邊行邊食，跟住我地穿過商店街，都係D小店，在其中一間文具雜貨店買了幾包煙花，諗住可以去登別/富良野度玩！由150-250YEN不等，很多款式！期間細佬已經醒左，爸爸坐在商店街的椅上餵飽佢，然後繼續沿住日銀通街道向小樽運河行落去。 |
| 不停食手指的信信... |
小樽的街道的易行的，推住車都OK，人唔多。途經「舊國鐵手宮線」當然要影相留念！再落去已經離遠望到運河，不過我地先去了出拔小路，幾間店聚埋一齊，我地就黎呢度食著名的popura farm哈蜜瓜雪糕！當然好正啦！食飽周圍影下相，仲見到對香港情侶來影pre-wedding，聽到廣東話是多麼親切呢！
影完相諗住離開出拔小路時，姑姐話差D唔記得去食雞翼，唔怪得頭先見中間有人坐係度食雞啦！即叫即炸，於是我地就把握時間去同運河影下相先。現場好大風，影多兩下都頂唔住要走，都未有時間去行，就同阿姑姐滙合繼續向東移動。
 |
| 你睇我個頭就知有幾大風... |
我地沿住「臨港線」行再轉番入堺町通商店街行，其實我地無咩特別目的，都係周圍睇下。其中見到有間賣好多姆明精品的！行行下就開始落雨了，姑姐買左把長傘即刻剪彩，佢原本話想買把made in Japan的，但我地都睇過幾個地方，竟然全都是中國製....
 |
| 呢間賣玻璃製品，好靚呀 |
去到六花亭就衝左入去避雨兼買手信，買夠指定數目(好似係6 千)就可以免稅，我們兩家夾埋成功夠數，掃完貨就走人。差不多行到最後就見到我勁想去的音樂盒堂，信心媽對於音樂盒都係情有獨鍾的，所以黎到呢度好開心，左睇右睇，姑丈和姑姐已經攰到行唔郁，爸爸負責捉馬騮，即係信信...行完呢度先發現原來本館在對面，諗住自己一個過去勁快咁行個圈，在門口位置聽到對香港情侶話「咁我地咪影唔到合照囉…」我二話不說搭訕：「我幫你地影啦！」對方聽到當然好開心啦！在異地遇到同鄉真係份外親切呢....我當然叫佢地幫我影番張獨照啦！入到去..嘩...本館仲大D喎，雖然都係類似既野，我好有衝動想買個呀…但係..價錢唔係平而且我最憎買D無用既野，所以最後打消了念頭，在我正諗住走時，見到爸爸入來了…為免大家等我太耐，所以快速閃人。
差不多沿路行番出去，其實六、七點佢地D鋪都開始關了，果然是靜靜的小鎮。我地就去覓食啦！尋找姑姐指定食肆，是在運河後的倉庫中，誰知剛好裝修定咩原因無開門，唯有轉戰另一間，最後去了民宿屋主介紹的一間叫「和樂」的迴轉壽司。入到去都要等位，但有個相當大的位置比你坐、又有書睇(當然是日本)，反正大家都行到好攰，而且外邊下著雨，總之有得坐就得。等了一陣已經有得入坐，一齊坐BAR枱，信信又好醒目地訓左！正呀！我又有餐好飯食！日本的迴轉壽司跟香港的差不多，都係按碟收費，食個飽飽！盛惠9573日元！即係600幾蚊食飽四大一小，好抵呀！ |
| 戰績彪炳！ |
晚餐過後在沒有夜生活的小樽市，我們沿運河回去，有人話D野夜景都好睇， 但我就覺得無咩好睇，如果係雪燈節期間應該靚好多....下住雨拖住一個細的又要推車，都幾呢hea所以都不宜多留，快快行返去民宿算了。
如果日頭出來時沒有專登留意清楚地貌，玩到夜晚回去時就會唔認得路....(還記得我和老公去希臘渡蜜月時就有呢個難忘的經驗....HAHA)不過現代人有GOOGLE MAP應該問題不大，我們今次憑感覺都成功認路，順利回到民宿休息了。由於信信未食飯，咁我地就整番熱D野比佢食，然後心心又食埋一份，仲有姑姐在晚餐時間專登出去買左隻雞回來(下午食雞翼那間，似乎佢真係好鍾意)，所以大大小小繼續宵夜....
呢間民宿真係唔錯，有家的感覺我最鍾意...我順利用佢既小電飯煲翻熱食物，臨訓又用洗衣機免費洗衫，原本係留待去到富良野先洗的，但呢度有得免費洗就洗左先啦...不過晾一晚真係乾唔哂，第二朝又用老公的特快乾衣法烘乾至八成...
我都係第一次訓正宗tatami，OK幾好，不過我地唔識搞房間的冷間，好在天氣唔算好熱，我地開少少門，讓廳的冷氣直吹入來就可以。
總括小樽遊，有朋友話只來半天，我覺得慢遊的話，其實我這樣一天也行不哂所有地方，不過時間不容許我留太長，宜家咁樣都叫做OK，可惜無時間做我想做的玻璃，其實中間有好多間賣玻璃的地方也有WORKSHOP，但之前做過功課，朋友有間玩過平D，但有車先方便去，反正小朋友在場我還是覺得有點危險，所以最後放棄了，相信日後還有機會的。一家人，可能少了一份小樽的浪漫，但至少到此一遊，還我心願了！
小樽觀光協會公式
下載小樽地圖
https://otaru.gr.jp/wp-content/themes/otaru/pdf/traditional_1.pdf
沒有留言:
張貼留言