北海道8日7夜親子自駕遊--租車篇

自駕遊最緊要就係租車啦！我本身完全唔熟車，咁多牌子咁多型號仲有咁多間公司，點識揀呢？好彩阿姑姐一黎就話租toyota，加上我地一共4大2小，仲要預位放行李，佢話要架大一點的，所以連型號都指定埋，咁我格價就容易好多了！


最後我地經Tabirai訂車，同訂酒店網一樣，日文版(http://www.tabirai.net/) 同中文版(http://tc.tabirai.net)的價錢，即使係同一款車，真係唔同o架！當然係中文版貴D！不過其實又唔係差好遠，因為我兩個小朋友都必須要坐car seat，而car seat呢又中文版平D喎，而且HEP係中文版先有，雖然網上都有人話在日本版訂左車，去到先加HEP都可以，不過當時諗住穩陣起見，緊係BOOK埋先啦！有人話會去到無GA！


HEP全名係「Hokkaido Expressway Pass」，係只限旅客先買得既PASS，因為北海道部份高速公路係要收路費的，如果買咗呢個PASS就唔洗次次比錢，總之一個價錢任行。至於抵唔抵用，就視乎你行咩路，信心媽呢D精打細算的，當然係事前計下抵唔抵先用啦，咁我就去咗

http://www.driveplaza.com/dp/MapSearch

呢個網頁度CHECK，當然你要定好左行程先，跟住咪睇番你由邊度去邊度，路費幾錢，網頁內的IC即係代表高速公路的出口，你google map都可以知道自己去的位置係用哪個出口。不過，我去完返來睇返真正既路費同呢度CHECK既有D出入，都唔知係因為我最終唔係行那條路定咩原因，不過我最後買既HEP都係平過我幾段路費加埋的！平少少咁多啦！

買HEP要幾多錢？就視乎你用車幾多日，以下呢度有寫：(租五日車就要買五日HEP，無得淨係買三日咁o架！)

http://www.driveplaza.com/trip/drawari/hokkaido_expass/tw.html


講多一句，要買HEP，首先你要向租車公司租ETC，ETC係一張咭，放係車度就會可以好似香港AUTOTOLL咁，只要過收費亭時駛慢少少就得，唔洗停低比錢，方便好多啊！我間租車公司係免費可租ETC的。


頭先講到我地係經Tabirai訂車，其實呢個網就好似係Trivago版既租車網，你入哂資料就會顯示不同租車公司的價錢係幾多，因為同一款車都可以有不同公司可租，咁就方便你一次過睇哂邊間最便宜，所以我地其實最後拎車既地方係toyota rent a car，但價錢就比我地直接去Toyota rent a car既網頁平。當然，有時嗰D租車官網會有自己既優惠，有機會平過呢D格價網。(據聞OTS租車係最平的，但只有機場和函館取車.，所以亦唔啱我地今次行程。)

最後我地揀左NOAH/VOXY 七人車，我地淨係租中間4日3夜，盛惠68564日元，已包哂租車費, HEP, CAR SEAT兩個和全保的保險費。唔租哂咁多日，就係因為我計過咁樣抵D！因為首天落地直接機場去札幌，又唔會周圍去，淨係咁樣一程又要租多一日(要15400YEN一日)又要比停車場費，自己坐車去仲化算！同埋都想試下當地的交通工具，之前聽人講日本交通費好貴(去完返黎都唔覺喎)，但原來6歲以下小朋友好多時坐車免費！所以成件事係抵到爛呀~~~

至於租車係咪要加錢買埋個全保？雖然姑姐話佢一定加，但我本身都有保留。作為理財顧問既信心媽，當然要睇睇本身個旅遊保包咩先啦，我地買既旅遊保都有一項係保租車自付額，有$5000，咁夠唔夠COVER出事要付的自付額？其實租車公司網頁都有寫的:

https://www.rentacar-jp.com/first_time_user/#insurance_compensation_system

不過事後發現原來變全保都只係加百幾蚊港紙，哈哈，咁唔洗諗啦....


準備妥當？出發！