北海道8天7夜親子自駕遊- 前奏(機票、行程、WIFI蛋....)

日本，乃香港人最愛去之旅遊勝地之一，偏偏信心媽3X歲人還未去過。


原本6年前與友人正計劃到北海道，誰知一個地震引來福島事故，旅行擱置，自此亦未敢踏足日本，要討論日本幅射是否有咁大影響可以另外講三個鐘，不過為安全計，反正世界那麼大，我都盡量選擇其他地方。不過由於沖繩都係一個親子遊好去處，而且離日本相對遠，所以信心媽原本就放下界線諗住去沖繩，而亦選好了同行的伙伴，就是信心媽的姑姐，因為她去過好幾次，話自己如何如何地熟路，咁就啱啦...我地都無車牌，有人幫手駕車就最好....原本正熱烈研討有平機票的時候，阿姑姐話：「北海道機票平呀！好少咁平呀！」於是被說服了去，其實北海道就是我十分想去的地方，所以...順水推舟，改了目的地。






今次選擇了「香港航空」(HK Airlines)，之前成日唔識分HK Express同HK Airlines，宜家兩間都搭過當然識分啦！HK Airlines係傳統航空公司，不過都成日做promotion，我地今次就係去年12月時趁減價買的，由於要就啱細佬兩歲前去，又想佢大個D唔洗我地咁辛苦，所以選擇了六月尾，在佢23個月時出發！！

大人機票每張連稅$2570，家姐買小童票連稅都$2415，細佬其實最唔抵，雖則話係BB票係正價機票的一成，但佢嗰個正價機票係一萬幾蚊！幾時有買過一萬幾蚊既機票？所以覺得有取巧，不過你都無Say，連稅$1610速榜！

訂好機票之後慢慢諗下行程，雖然六月尾未到欣賞薰衣草的最佳時機，不過因為七月機票又貴一截，所以我還是師奶心態揀左六月。按我和姑姐的所需，最後訂的行程就是

Day 1: 香港--札幌
Day 2: 札幌--小樽
Day 3: 小樽--余市--登別
Day 4: 登別--白老牛--富良野
Day 5: 富良野
Day 6: 富良野--美瑛--札幌
Day 7: 札幌
Day 8: 札幌--香港

研究完後D行程先發現，我地宜家札幌入札幌出，免不了要走回頭路，如果下次再去， 可以選擇上落機不同機場，例如去函館呢D地方，咁就唔洗用幾個鐘車程返札幌了。不過港航無得揀，好似ANA那些航空公司先有，大家可留意。

另一樣想講下既就係WIFI蛋，宜家個個去旅行都要經常在線，究竟蛋好定咭好？呢個問題相信唔止我一個人問，最後，我同姑姐兩個人夾埋係租左一隻蛋同買左一張咭。蛋係KLOOK租的，基本上都平通全港，只係$13/日無得輸！而且在機場借同還，十分方便，聽到既大部份COMMENT都係話網絡好穩定，所以我都放心的，而事實用落個網絡都係OK的。唯一的兩個問題係，真係需要尿袋旁身，用唔到一日就要叉電，而且由於隻蛋唔會下下拎出黎，有時係無電到熄左都唔知，呢樣就真係電話咭優勝一點！同埋旅行途中試過隻蛋死機，開頭以為無電，但點叉都無反應，搞左一輪以為壞左，醒起佢有個WECHAT客服係24小時，我晚上十一點幾在酒店聯絡客服，好彩真係有人即覆，教我拆電出黎等陣再開，於是成功用得番，好在！




至於用咭呢？我地在團購買的($75)，其實深水埗鴨寮街仲平仲多選擇，有D又限速有D又無限，無個樣話無限但原來可能都係有限…我地買的是每日首200MB數據為4G LTE其後數據為128Kbps無限上網，因為主要係姑姐用，所以我唔係好知實際速度點，不過佢就話「都唔係4G既！」咁囉…不過去旅行都係最緊要用到whatsapp同同行者聯絡、上係fb呃like、google map之類，所以我就覺得即使限速都夠用...之前我問過一個好似好低能的問題，「換左張咭，人地仲同我Whatsapp到咩？」有個網友回覆我話咩係跟系統唔係跟電話號碼？我都唔明佢講咩呀...哈哈哈，總之最後事實證明係用到啦！用咭係要在電話做D SETTING既野，一部電話聽講做一次就得，下次再去即使係另一張咭都唔洗再SET(唔知真定假)，你話難又唔難既，但對於機器白痴黎講，呢個可能係用咭的一個缺點。同埋至今我都唔肯定用咭係咪可以SHARE網絡，但用蛋一定可以！


之前我以為，用咭起碼可以到時打電話比當地無得用whatsapp聯絡既人，但後來我發現原來呢D咭係無話音功能的！即係無得好似平時咁打電話，睇過D文章好似話係日本既唔知咩規定喎...anyway，結論係如果2-3個人去唔會分頭行事既，一隻蛋SHARE用係好抵既，但如果係會分頭行事需要聯絡既，都可以選擇我咁樣咭+蛋就無萬一失啦！


其實我首次到日本、首次自駕…我咩都唔識，好多時係上網問人，在此特別鳴謝FB「北海道自遊達人」的各位谷友，學左好多野呢！(所以我寫好呢篇blog會貢獻返給大家的！)