我哋一坐低佢就送咗四碗免費雞湯俾我哋，好好人呀！食到中途佢仲主動問我地要唔要添飲， so Nice ！

餐牌上顯示，如果叫Mee小食拼盤，佢哋就會捐$10比香港信義會社會服務部，似乎係一間良心企業喎，我都支持一下. 小食拼盤（ $158 ）包括蝦餅x4、串燒(雞及牛）、4件春卷、2隻雞翼和無骨鳳爪x4，蝦餅同串燒都炸得幾好！
另外叫咗一個「馬來一品牛柳粒」（ $98 ），有洋蔥、西蘭花一齊炒牛柳粒，相當入味和惹味，佢亦都落咗一串好似提子仔咁樣嘅泰國香料，唔知咩麻子，千祈唔好咬，辣到我飛起！但本身就咁食牛肉係冇辣味嘅。
因為有小朋友在場，所以我哋盡量揀啲唔辣嘅食物，主菜要咗一個「大蝦炒金邊粉」（ $78 ），甜甜地都幾開胃，碟旁邊附有辣粉，夾嘅時候小心就可以。
「無骨海南雞配喇沙」（$84），一碗包含兩種麵，有豆卜和蛋，湯底濃味，海南雞軟滑，仲有青瓜、蘿蔔絲和花生伴碟，都唔錯。
我最鍾意係「馬來蜜汁炭燒厚切豬扒配菜飯」（ $78 ），分量幾多，豬扒好鬆化，食落有啲似叉燒嘅感覺，食落唔覺得肥膩但係好惹味，配以菜飯平衡下一流！
食泰國嘢梗係想食返個「芒果糯米飯」（ $48 ）作為終結！一疊四件，另外再加上少少芒果粒，糯米飯夠晒煙韌，芒果又夠甜，點埋椰汁就very good啦！
臨走見到reception位有一兜玩具，老闆仲好好咁送咗兩個俾我嘅小朋友呢！估唔到係一間親子餐廳囉！
沒有留言:
張貼留言