又到了一年一度小一放榜的大日子！對於入左紙玩大抽獎的家長的來說，一定很緊張了！入到心水學校當然開心，入唔到就要玩埋最後叩門一關了！信心媽去年就玩足全程，由最初自行玩計分、到大抽獎到最後叩門，終於成功叩入第一志願啦！可以同大家分享少少心得：
在收到放榜通知之前，其實都應該開始做功課，包括了解下你心儀學校的叩門程序，例如幾時交表、要交咩資料文件等，大部份學校都會在網頁寫得好清楚，同可以下載叩門表格，當然相片、相關文件的副本、推薦信和portfolio等，全部都應該事前準備，尤其是推薦信和portfolio，因為有些學校在放榜後的幾天內就會截止收叩門表，如果你無一早準備好，到時先求人2日內寫好推薦信比你，就未必拎到啦！(雖然心心幼稚園學校校長的推薦信，係講明放榜後先可以要求，呢個都明既，個個學生問佢拎又唔係個個用得著都幾煩)，另外我地都有教會牧師的推薦信，為表誠意，我都寫左一封自薦信，而內容都會就住不同學校所重視的方針而略有不同！仲有簡單幾頁的portfolio，全部都係放榜前預備哂，寧願做左無用，好過到時心急做都唔會做得好。
還有一件事一定是事前做的，就是去聽學校的簡介會。簡介會不單讓你了解學校是否適合你的小朋友，你也可以從中領略學校所重視的價值觀，從而在叩門時更掌握學校心水，投其所好。
到了放榜後，還記得望到通知書的一刻，是排第五的寶校，心情未於至情天霹靂，因為都有哂心理準備，在龍年效應下，入唔到第一志願，基本上就是寶校，其實我都接受的(所以我之前沒有申請任何直資/私校，有機會再跟大家分享)，當然我會盡最後努力去叩門。
於是，我頭四間志願的學校我都去叩，2/6放榜，4-8/6期間我們先後向這四間學校交表叩門，然後就是等interview的機會，我主要集中講我們最後成功的第一志願：馬鞍山循道衛理小學。我憑記憶和其他有叩門的家長，縱合了兩次面試的內容給大家參考：
12/6進行首輪面試，馬循是非111都會見的學校，而且所有入表的人都會見，老師告訴我，今年有300幾人面試，爭取15個叩位位置，聽到都覺得驚。首輪面試以小組形式進行，大約5-8個小朋友一組，老師會同小朋友玩遊戲(大風吹之類)，也會講故事然後叫小朋友答問題，另外也會考普通話讀字、數學和英文，每個組別都可能各有不同。
在小朋友面試的同時，老師也會見家長，主要都係問點解揀呢間學校，同埋是否贊成普教中，家裡是否可以支援到，因為馬循是普教中學校，所以呢點都好緊要，同埋老師都會睇下小朋友幼稚園成績表。去面試既家長， 首先盡量兩位一齊出席以表誠意，其次當然要自己温好功課，熟悉呢間學校既運作、教育方針、價值觀等等。
1st完之後就係等，佢話會寄信通知，15/6已經有家長話收到馬循電話有得2nd in，我等左一日都無電話，正失望之際，16/6未夠9點我就收到電話了！很高興！
20/6去2nd in，一早去到等了一會兒，就被安排和校長及副校長見面。內容大致如下：一入去當然要打招呼，校長寒暄幾句，問你食左早餐未呀之類，就比本書小朋友睇，請佢一陣分享番，然後就同家長傾下計，主要都係點解揀馬循、叩左幾多間學校、平時邊個湊小朋友，同埋覺得自己小朋友有咩優點同可改進既地方等，校長一路傾一路揭我地交的文件，佢都有留意到我地兩個係循道衛理中學的校友，心諗唔知係咪有得加分呢！跟住就請小朋友分享番頭先本書既內容，分享咩都得，另外送左張印有金句既八達通套，問佢上面既圖畫想表達咩，問佢知唔知呢個咩黎。而枱上亦放左好多不同東西，隨意抽起一個問小朋友係咩、點用，心心被問到一個「防撞角」點用，放係邊度用等等，最後校長仲拎左一隻無腳既狗仔，問心心呢個公仔有咩特別，點樣可以幫佢加番對腳等。
成個過程，我覺得未必係睇小朋友答得啱定唔啱，而係睇佢應對、主動性、創意、日常知識等，內容年年不同. 我朋友個女幾年前叩. 同我們去年叩都不一樣。不過心心都可能緊張，比起佢平日的表現差幾成，無辦法啦，唯有等待天父安排。
之後都係等待既日子，中間我也有寄一封感謝信給校長。到了佢預定的日子，我們沒有收到電話，但見到有信寄來了，最後結果是叩門的後補第二名。由於在網上見到曾經有校長話，識人好過識字，所以我都盡最後努力，嘗試睇下有冇辦法揾到人識到校監嗰D幫幫手，用盡方法後都係唯有等，希望有人叩門後都放棄。
3/7我再致電學校詢問學位的事宜，不過暫時還未有空位。終於在9/7的中午，我收到馬循電話話有位啦！問我小朋友會否來註冊！感謝主！11/7老公到學校註冊，同場至少有五個學生的家長都來註冊，照咁睇，即係叩門滿額後，其實都仲機會收多幾個，唔知係咪咁啱今年借班比91網，沙田既朋友派左入黎最後又有位轉走，所以先收咁多後補...呢D嘢無得估，但我聽過朋友仔係去到開學前一日先收到心儀學校打黎叫註冊，所以各位家長，未去到最後都唔好放棄呀！甚至有人教開學一星期都仲可以打去學校問有冇位呢！！
順帶一提，除了馬循，我們還有入紙叩馬陳、禧年和靈糧，馬陳只見小朋友沒有見家長，2nd in先會見家長﹔禧年都係只見小朋友，幾百人排隊分組上課室，一組都15-20人，講明無2nd in﹔靈糧等候期間有位比小朋友去填色畫畫或睇圖書， 我唔肯定老師有冇呢個時間已經比定分，等到之後就一齊去見老師，都只係簡單問幾條問題。呢三間我地全部都無2nd in。
老實講，去到叩門面試之前那刻，其實都無得點再谷再温書，所以真係睇平日點教小朋友，知識係累積的，就算知道大約內容都可能只幫到少少，有個心理準備，所以勸家長們都係平常心，即使最後叩唔到，都唔好比小朋友覺得自己間學校唔好。我深信一件事，只要自己努力，環境怎樣都不能太限制你。祝福大家都入到心儀的學校！
更多文章分享：
https://www.facebook.com/shunsumjourney/
信心媽以前對「旋轉木馬」有情義結，大概是覺得好夢幻好童話吧，所以到廿幾歲人去主題樂園玩都仲要去玩旋轉木馬(又或者因為我唔敢玩其他機動遊戲！)不過，要與大小情人坐旋轉木馬，又豈是只在主題樂園才能做到？住馬鞍山既朋友，應該都會知道馬鞍山廣場有一座旋轉木馬可供免費遊玩！在一個普通的商場內，有一座旋轉木馬，我其實覺得都幾勁！我懷疑香港之內，佢係唯一一個商場擁有此馬！所以連商場的logo也是旋轉木馬！
而個重點係，佢係免費！真﹒免費！不須在商場內消費滿幾錢才可以玩，只要你肯排隊等就得！基本上逢二至五的下午3:30-5:30以及星期六、日及公眾假期的2:30-4:30及5:00-7:00都會開放！不過有時商場內有其他活動舉辦的話就可能會暫停開放。
由於佢唔係不停玩，而係每十五分鐘先開一次，一輪大約可以上到26人包括大人及小童，大約轉一分幾鐘，所以大部份時間去到都要排，平日可能會好一點，玩完再排無難度！心心以前好驚坐旋轉木馬，基本上會轉的東西她也不敢，終於到現在六歲了，可能和細佬一齊去玩！
呢度交通其實好方便，坐港鐵馬鞍山線到馬鞍山站一出就到商場。如果區外的朋友專登入黎，無理由淨係玩次旋轉木馬就返歸架？除了可以在這兩個相連的商場行街食飯、周圍打卡(商場按節日不時有靚靚打卡位)外，附近仲有個免費好去處！
就係沿住商場後門的一條天橋到對面街的地下，大約五分鐘就可以到馬鞍山圖書館以及運動場內的兒童遊戲室！圖書館設有兒童圖書館，來個親子伴讀多麼美好！文靜完又可以去對面的兒童遊戲室玩，而且近來剛剛裝修完，靚左好多呀！不過人多就要排隊拎籌了！大家可以按此留意時間表。
以上活動全部室內，唔怕落大雨又唔怕天氣熱！如果天氣好，仲可以行埋去隔離的馬鞍山公園玩，除了兒童遊戲場，仲有好多個大草地，方便野餐家庭樂！仲有海景睇添！所以馬鞍山真係一個好地方呢！
更多文章分享：
https://www.facebook.com/shunsumjourney/
[Casablanca Restaurant & Cafe: 尖沙咀亞士厘道23-25號雅士利中心6樓]
今日專登請假和老公兩口子去拍拖吃個午餐，選了間比較特別的餐廳，食摩洛哥菜！恕我無知，其實我連摩洛哥在哪邊都講不出來，google 一下原來在北非...
由尖沙咀的街道上乘lift上餐廳，一開門，已經見到很多令人感覺新奇的裝飾，踏入門口，更加感受到異國風情籠罩著！牆璧上掛著特色畫像、碟和樂器，吊在天花的燈飾很令人感覺很不一樣，加上播著不熟悉的音樂，像是離開了香港一般。
一切都令人感覺新鮮，食物當然更有特色！(我想講連隻碟都好靚)
雖然我們是中午來到，但餐廳提供了散叫菜牌和二人餐及晚餐套餐可選，最後我們選了個「deluxe set」，餐牌以英文為主，部份配份中文解釋，但看英文都不會知道那是甚麼，基本上都是看圖理解，所以即使店員都是說英文的，用身體語言都一定可以溝通到，就是指著餐牌點菜也可以！
套餐裡有兩個湯可選：包括犘洛哥蕃茄濃湯(Harira Soup)及扁豆湯(lentil soup), 侍應好細心當我地叫犘洛哥蕃茄濃湯時提別提我地這個有羊，怕有客人唔知又唔食得，不過我飲落就唔係好覺得有羊味，亦沒有羊肉食到，可能係要黎餚湯。蕃茄湯同我地平時飲的味道截然不同，蕃茄味唔係好覺，但就好足料，食到好多豆！根據佢餐牌的介紹，呢個湯有蕃茄、羊肉、扁豆、鷹嘴豆、芫荽、香菜、西芹等，相比Harira Soup，其實我覺得扁豆湯仲濃味，但反而飲唔到有豆！哈哈！個名係咪調轉左！扁豆湯都用左西芹、洋蔥、芫荽、扁豆、蒜頭和蕃茄來煮，口感很rich。
至於沙律，我們選了土耳其沙律Turkish Salad，有生菜、生洋蔥、車厘茄、青橄欖、水牛芝士和青瓜，味道清新！
而小吃就選了falafel，有三小件，呢個都係一個特式中東小食，油炸豆餅，深啡色外層香脆，還有很多芝麻附著，咬開可以見到係綠色的豆蓉，可以點醬料來食，帶點微辣，雖然外表會令你想起另一些東西，不過味道都不錯。
套餐還包括飲品，可選芒果拉西和摩洛哥薄荷茶，我們也試了兩款，芒果拉西就是芒果奶昔，冰凍清甜，帶點creamy狀，好味！
摩洛哥薄荷茶都值得一試！用特定的錫壺盛載，店員幫忙倒茶，倒過一杯，再輕輕搖搖錫壺再倒另一杯。信心媽對茶沒有研究，分不出是紅茶還是綠茶，但薄荷香就一定聞到。翻查資料，原來犘洛哥人不可一日無茶，煮薄荷茶時更會下一把糖，不過我倒不覺得有甜味。好奇打開錫壺看看，有很多(應該是)薄荷葉在當中，而這個錫壺也很保温，我們吃了整頓飯，再倒出來的茶還是冒煙的！一壺已經足夠兩個人享用有多。
終於到主菜出場，我們點了一個咖喱羊Lamb Curry和Chicken Tagine。Tagine中文譯「塔吉鍋」，是一個轉漏斗形狀的陶鍋，摩洛哥人的傳統煮食器皿。差不多有半隻雞的份量，應該就是在這個鍋中燉出來，雞肉相當淋，配以當中的濃味醬汁，還有些薯蓉在底，味道帶點咖喱味但卻不覺得辣。
另外的咖喱羊，羊肉不少，紅紅啡啡的咖喱也不太辣，配白飯和烤餅都很不錯。
很想一提配主菜的白飯和亞拉伯餅，白飯比我們平時吃的較長和軟，但那種軟身和平日的「淋飯」很不同，不知怎形容，令我想起有點像吃米粉，頗喜歡的。至於那個亞拉伯餅Arabic Bread，上枱的時候是漲卜卜的，表面有少少蒜蓉牛油，而裡面是空心的，一撕開餅就塌下，餅本身沒有太大味道，配以濃味的咖喱或醬汁就剛好配合。邊食邊令我想起當年跟還是男朋友的老公，去過一次重慶食咖喱...
二人餐本身有另一款餅叫naan bread可選，當然我們都不會知naan bread和Arabic bread有何分別，便亂點naan bread，不過店員很好告訴我們，這個會有點硬，怕我們吃不慣，建議我們選Arabic bread，很好呢！上網看看原來naan bread就是印度烤餅，看樣子其實我覺得兩者差不多，哈哈！
未吃完主菜我已經飽到不行，想不到這個二人餐這麼豐富，還有最後的甜品，我們請店員給我們一份好了，免得浪費。這個亞拉伯甜點Mahalabia倒也幾好味，店員說這是由奶和粟粉造出來的，甜甜的很有口感，有點像吃椰汁西米糕。
第一次吃摩洛哥菜，感覺其實跟印度菜很相似(就像外國人應該也分不出上海菜和廣東菜的分別吧！)，大概都是香料很重的東西，如果無機會去一趟摩洛哥，來吃一餐也是不錯的體驗呀！
