越是好味道

[錦麗： 馬鞍山鞍祿街18號MOSTown新港城中心(4期)2樓2106號舖]

之前聽同事講過「錦麗」好出名，竟然佢在馬鞍山開分店，於是趁今日放假同老公來撐枱腳。黎都已經一點幾，所以唔洗等位，直入即坐，裝修都有點越南風，用好多竹/騰既元素。中間有大枱、旁邊有卡位、同埋另一邊係幾張二人枱，沒有BB椅提供，家長們自行選擇。

睇睇餐牌，款式唔算好多，第一次黎當然想試招牌菜，但同時又想試其他的，仲試埋杯越南咖啡添。

之前係網上睇左呢間錦麗的廣告，特別有講點食法，而每張枱上面都同樣有指示教你最正宗食法！其實我地一坐位，侍應已經放低兩杯配料比我地！配料仲可以無限供應！

錦麗綜合粉($66)送到啦！雖然有生牛肉，但上枱時都唔係好生，而且當你影完相、再跟佢食法又飲湯又落配料，搞完已經熟左了！不過就剛剛好，唔會韌，粉既份量OK，有3個半粒的牛丸、2大片牛肉及2大2細牛腩，湯係幾清甜！加埋配料香草就好香！牛肉佢都有教你用甜醬同拉差辣醬，一試無妨！

跟住仲有個蕃茄蝦膏海鮮濃湯檬($68)，一上枱就聞到好香！份量都OK，不過得2隻蝦、一塊札肉、3-4舊豆卜，都見唔到有其他海鮮...隻蝦雖然細隻不過就好新鮮，湯就真係好濃味！咁我都有落配料，所以更加香！

今次仲叫了小食，大蝦扎肉米紙卷($30)，裡面有蝦、札肉、青瓜、蘿蔔絲、綠/紫(椰)菜等，札得好實淨！點埋醬料酸酸甜甜好清新！微辣！蝦好鮮！

仲有凍越南滴漏咖啡($30)，佢真係放係你面前慢慢滴哂成杯，杯底本身有煉奶，一邊食粉一邊睇佢滴，大約十分鐘左右都滴哂，店員主動幫你取走滴壺，咁你就自己倒落個冰杯度啦！我地已經叫少冰不過都係成大杯冰，自然會溝淡左，我都有試熱的版本，濃好多，但凍的也好飲！係幾好玩的體驗，立即想起當年和老公去柬埔寨都飲過煉奶咖啡！同埋佢隻杯碟好靚！

整體味道幾好，不過我地叫咁多嘢先剛好飽！價錢中上啦，又唔算好貴，偶爾食好D都開心架！

不過呢間店唔係幾環保，第一，提供水比客人竟然紙杯仔，其實其他碗都要洗啦，點解要用紙杯呢？我同老公就用裝配料那個膠杯來裝水飲。第二，落單係直接tick落張餐紙度，其實佢又唔係多選擇，唔似得車仔麵咁，根本無需要咁樣，普通叫WAITER來落單就好，何必浪費紙張呢！