除了尋蛋之外，當然不少得玩下樂園設施，而今日更是全球第一個以蟻俠與黃蜂女為主題的遊樂設施「擊戰特攻」開幕，梗係要立即去「明日世界」園區試試！不過新嘢梗係多人玩，所以我們先轉戰旁邊的Iron Man遊戲，信信由於唔夠高(要102CM先玩得)，爸爸就同左佢去排隊影相，我同心心兩個入去玩！呢個4D遊戲我未玩過，心心上次黎同爸爸去，佢都係有點驚，今次同我一齊挑戰！
排隊入去戴好3D眼鏡扣埋安全帶就準備起飛啦！驚就唔算驚，不過飛來飛去係有點暈，心心依然細膽本色，某D位扒低唔敢睇！哈哈！玩完出黎順便去登記絕地武士遊戲，一日得幾場，唔早點登記就無位啦，我地12點左右已經登記緊3:30的場次。信信未夠四歲又係唔玩得！周圍影左一陣相之後，剛好差不多開場睇「米奇魔法書」，為滿足信信想見Elsa的慾望，就帶佢去睇，事實上我自己幾年前睇過呢個SHOW都幾鍾意！如果夏天黎，這裡更是一個好好比你休息下的地方！喜歡佢大部份歌都好好聽，舞蹈好睇，道具背景做得好好，還記得第一次睇當Elsa行出黎時真係連我都有點毛管戙的感動，今次有心理準備就無特別感覺，反而覺得Elsa相當唱得無咁好，同埋都係覺得唱耐少少更好！信信見到喜歡的Elsa好開心呢！本身係諗住可以同Elsa「真人」影合照，但我地問左工作人員先知原來宜家Elsa好少出黎影相，太可惜了！(不過後來在迪士尼網頁見到原來2021年會有新的「魔雪奇緣」園區，到時一定見到佢啦！宜家唯有同信信講，Elsa全日都要去表演，唔得閒出黎影相呀！
睇完SHOW原本想玩埋旁邊的小小世界，不過忽然由10分鐘等候變20分鐘(可能就係個個都完SHOW行入去)所以決定去食飯先！Lunch時間餐廳當然多人，原本去左「笑匠歡宴坊」不過由於我地事前買左餐卷係可以食$149以下的餐，但呢間餐廳通常都係$115左右，所以爸爸建議轉場，就去左「皇室宴會廳」，其實今晚又黎呢間食，不過唔緊要啦，下午食D嘢都唔同既，一黎度我同信信心心就去揾個位坐低，爸爸去買嘢。我地坐在室外，後來爸爸打比我話佢分左幾條隊買嘢，叫我入去一齊排，入到去先發現原來裡面都好多座位。由於現場非常多人，到我地買完嘢食出番去，竟然聽到信信在喊，可能唔見媽媽太耐了，家姐也有少少眼濕濕，應該搞唔掂細佬搞搞下連自己都有點驚，似乎我都係高估左佢地既能力，可能環境都有點陌生同埋時間太長，平時去大家樂離開一陣都無問題的，下次都不要這樣了！
順帶一提，呢2次去迪士尼我都事前在網上買餐卷，因為園內食嘢價值都比較貴，全部都過一百蚊一個餐，但餐卷$139左右已經包一個$149的餐以及一個小食(雪條/爆谷)，雖然平時我係唔會買小食，但咁樣包埋又幾好，起碼佢地要買乜買乜時我有樣嘢可以叫停佢地！哈哈！餐卷在門口SCAN QR CODE後換左張好似門票的東西，買餐/小食比店員一SCAN就得，十分方便，仲快過人地用現金！
飯後直接去左隔離睇3D米奇幻想曲，呢個都係好受小朋友歡迎的遊戲，上次信信仲未識用3D眼鏡，今次雖然有時佢都會除左眼鏡但提下佢又會帶番，同埋見到佢會瘋狂地「抓寶石」和唐老鴨，就知道佢都enjoy到呢個3D遊戲！玩完呢個信信又話要玩旋轉木馬，不過心心一向都驚快和轉(似媽媽！)所以我同佢諗住揾卡通人物影相，不過夢想花園裡只有Eeyore而且已截龍，所以我地都係影下其他硬件。小熊維尼都好想玩，但一直都好多人，排半小時，我地諗住拎快證到夠鐘先來！
玩完一陣就夠鐘到心心去挑戰做絕地武士，上年五月跟學校黎時驚到中途逃走，今次佢終於成功啦！一班小朋友穿好袍，拎住光劍練習完就逐一去擊打壞人，加上訓練員的旁述，其實大人係會覺得好好笑，但一個細路叫做自己去面對呢個壞人，細嗰D真係會以為真架嘛！所以成功挑戰其實都好叻！心心事後話都有點驚，不過堅持下去！見到佢成長了！真感恩！
跟住我地就去迷離莊園行左轉，之前以為個迷離大宅好得人驚所以唔敢帶佢地去，但聽朋友講原來無咩咁驚之後決定今次去玩下。排隊是在所難免，但迪士尼係好在設計到排隊時你總有嘢睇下，所以唔覺唔覺又到了，坐上遊覽車去觀摩迷離大宅，係睇一些古靈精怪的東西，配合音樂、燈光咁樣，某D位係黑D同有D少少恐佈嘢，小朋友係可能會驚的，信信中間都話：「幾時去番迪士尼呀？」
玩完出黎換支雪條，差不多夠鐘去欣賞「迪士尼明星春日慶典」，我們和其他很多觀眾都聚集在廣場舞台等待迪士尼巨星出場！未幾，穿著色彩繽紛春日服飾的米奇和米妮，伴隨著開心的音樂，帶領著Donald Duck、高飛、布魯圖、Duffy與好友等迪士尼巨星，以及其他舞蹈員一起進場，在舞台上翩翩起舞以及和大家打招呼，絕對是近距離拍照的好時機。佢地D衫真係好靚和配合春天萬物復甦的感覺，正好為這個灰濛濛帶點雨的日子驅走悶氣，帶來無限歡笑， 小朋友都睇得很雀躍。整個表演大約6-7分鐘，與以往的巡遊感覺不同，相信只是近月限定演出，有興趣的朋友記得早點去霸個靚位呀！
睇完慶典仲有少少時間先去食飯，原本諗住排Winnie the Pooh，我地拎的快證都唔啱時間，撞左其他本身計劃左的活動，唯有親自去排，點知信信又話唔玩，唯有同佢去排船仔！諗住兩邊分開玩，但後來家姐還是想一齊，寧願放棄維尼。其實我今次係下載了迪士尼的Apps，佢裡面可顯示每個遊戲的等候時間，但後來我發現唔係好update，例如呢頭顯示小小世界要排25分鐘，但去到其實無乜人，門口顯示係5分鐘，但基本上我地一直行唔洗等，已經直接上船。
小小世界係另一個比大人休息的位，全程10分鐘好舒服坐船涼冷氣聽音樂，小朋友好enjoy個環境，信信不停話：好靚呀！又真係幾靚既！上次黎佢已經好鍾意，今次玩完又話再玩！我見無人而且有時間就再去啦！心心同爸爸就去排維尼！
滿足哂大家的願望後，係時候去食飯。所謂歡樂的時光過得特別快，轉眼已經玩到天黑，今日獲親子王國安排在皇室宴會廳享用一頓豐富的自助餐！職員細心安排好座位後，我們都急不及待去看看有甚麼好吃！取食物的地方都幾大，分開燒烤、廣東、和風和環球四條隊，現場所見款式應該都有40多款，例如焗香辣雞扒、烤美國肉眼牛扒、羊架、雜錦壽司、蝦餃燒賣點心、四川麻辣雞、蒸時令鮮魚、夏威夷薄餅、魚手指、洋蔥圈、奶凍、芝士蛋糕、紅豆沙湯丸等，總之中西美食應有盡有，部份食物更配合迪士尼造型，例如甜品上插有米奇米妮的朱古力牌、米奇形狀的啫喱和紅蘿蔔等，令小朋友食得更開心！我自己就特別欣賞羊架，好大件又好味！炸物也不錯，不過不能吃太多呀！
除了美食之外，我們還可以同唐老鴨合照呢！王子打扮的唐老鴨一進餐廳，就引來一眾食客前往拍照，大家都好守秩序按指示排隊等候。到我們的時候，細佬忍唔住立即衝過去同唐老鴨玩，見他們的互動真是有趣！工作人員很好幫我們用手機拍照，留下一張今日最美的全家福！
想到皇室宴會廳一嚐滋味？只在2019年3月15日至 5月5日期間的週五、六、日及公眾假期限定提供！每晚分5-6:30及7-8:30兩個時段，每位成人$288、小童港幣$198(另收加一)，相比下午平均用餐也要$130以上，這個自助晩餐可謂相當抵食呢！網上預約更可慳加一服務費呢！
在迪士尼食晚餐的好處是，夜晚少好多人玩遊戲，唔洗點排。今日入園的其中一個任務就係去玩蟻俠與黃蜂女：「擊戰特攻」，全日都好多人排，所以等到夜晚拿拿聲食完飯就衝去玩。以神盾局科技館被邪惡組織 Hydra入侵為故事藍圖，總工程師Leslie Lam(即係宣萱呀！)邀請我地一齊作戰！一入到神盾局科技館就見到一大部電腦好像指揮總部一樣，加上強勁音樂，感覺相當逼真，一路進入核心範圍的時候，亦一路有片段解釋是次任務，除了蟻俠和黃蜂女，也有Iron Man的出場，感覺有趣！終於來到登上「突擊」戰車的一刻，拎起支電磁脈衝槍準備開戰！現場雖然燈光暗淡，不過三歲的信信都無有怕，玩得相當投入！每逢見到黃色的目標立即開槍射擊！車上更有紀錄分數！可以互相比拼！俾個貼士你，想取得高分，可以瞄準目標不停發射，直至車身轉向另一方向或向前移動時，再立即找另一個目標開槍！就可以大獲全勝！
