1111被稱為光棍節，宜家變成全城購物節，周圍都係咁叫你買嘢....我地一家四口，參加了信心媽公司康樂會辦的兩日一夜之旅，(話哂我都係呢個康樂會既秘書，無理由唔支持下既...)所以我地一齊撇開世務，返大陸「輕鬆」一下！
 |
| 博物館內 |
 |
| 博物館內 |
影完大合照之後就自由活動，呢個景點基本上都係睇D古舊建築咁，有唔少小食檔，兩隻馬騮當然又話要食，買了每人一條價值五元的腸仔，總算換來清閒一陣。一齊行入去個「博物館」參觀，我無咩心情慢慢細看，展出了一些舊時既用品咁囉，仲有D文字介紹下呢個甘坑客家小鎮，出面有荷花池都叫OK靚，影幾張相又周圍行下，老老實實，要自己專登黎呢度就無謂啦…無咩好睇，差唔多夠鐘又回去集合，又要拉牛上樹咁拉住信信行，跟住就見到最精彩的一幕，有個內地小孩當街表演痾尿！！係！佢真係表演咁，佢阿媽係後面扶住佢，佢就特個咕咕出來射條尿柱出黎，仲射到好高好遠！但係我地係成棚人咁企係隔離，毫不羞恥，所以真係好難怪某D朋友真係死都唔肯返大陸既.....我差點想影低佢添呀...
算啦...等左一陣車到了就快快上車，跟住就坐20分鐘車去食飯。導遊帶我地去左個「六約山莊」地方食飯，門口有個大水車都可以影下相，不過旁邊就裝修緊，有少少大殺風景。餐廳都大，我地直上兩樓，比我地包廳，不過內地既酒樓你唔好太大期望啦，唔係新淨，冷氣起初略嫌唔夠，不過係咁啦....今餐食客家餸，導遊的介紹，sorry，我都唔係好聽到，無辦法啦，左一個右一個不停講野和要求呢樣嗰樣，分身不瑕。餸菜我覺得都OK的，兩隻小鬼總算乖乖食，食完放佢地在廳內玩都OK。食飯當然不少得係去廁所，以大陸標準來說，算乾淨囉...換埋片又上車了…
是日最後一個景點，就係大芬油畫村！主要都係睇個博物館，門口有個由大墨硯雕成的清明上河圖，想仔細欣賞下不過有人拉住哂，睇唔到。入到博物館睇畫，門口竟然要安檢？但老公行過BEE BEE聲，個實Q都無理佢，真係唔知整黎做咩.....D畫呢...其實我就真係唔識欣賞，唔知咩好唔好，不過就行下囉，有兩層高，但好搞笑我地搭LIFT上去二樓，但落黎時架LIFT唔郁，有上無落？？不過後來諗下可能係因為樓上要清場所以關LIFT，行樓梯落番黎，見實Q哥哥準備封樓梯，點知信信係咪要又上又落係度玩，唉....佢有時就係咁，話極唔聽，令人好攰....抱走佢，大喊，又要揾野哄佢…我D同事都話見到我都覺得好攰.....
 |
| 大墨硯雕刻好正！ |
 |
| 明顯我地都唔識欣賞囉 |
 |
| 好似自中學要被逼參觀美術館後，我都無睇過畫展... |
博物館門口有幾個小檔，都係賣下小手工，質素一般。其實油畫村仲有好多條街的地鋪可以行，但我要帶住呢隻馬騮已經好攰，淨係想快D上番車....其他同事去左行，仲有人買左幅畫，一百蚊人仔。導遊姐姐教落，記得講價...佢話曾經有團友比左2萬蚊去買幅畫....係2萬蚊！！事後覺得比人老點，想追數梗係無人彩佢啦...不過藝術呢D野無價既.....(有人覺得) 導遊姐姐仲話，呢D既人炒畫好叻GA，你想要咩畫，比佢睇下佢就畫到，呢點我當然唔質疑，所以有些店係不准人影相的。好啦，終於完成今日既景點可以返酒店了！而信信終於都瞓著了！！我都終於可以休息一下啦....今次入住福田香格里拉，咁不論大堂、房間和其他設備，整體都OK靚既，落車行埋一邊等左一陣就可以上房了！我地係大床房，間房都算大呀！心心去襯酒店都好開心，我地休息左陣就諗住外出行下，原本有諗過去酒店泳池游水，但一來要游水就要帶好多野，二來我覺得D池水應該會凍，因為我問過酒店佢話28度，但其實香港康文署D泳池都係差唔多温度，但心心上次去顯田游就話好凍，所以我覺得都無謂搏。不過一提係，去游水的朋友記得帶泳褲，泳池好似有得借，唔想借就要買，水泡可以入場，水深約1.2-1.4米。事後不少同事都問心心：有冇游水呀？仲話D水好暖....好彩心姐無扭計....
其實酒店叫做在福田市中心，附近已經有商場，我地主要都係去消磨下時間，媽媽就想找部ATM機CHECK下個大陸戶口有幾多錢，不過竟然話我密碼錯誤？！錯兩次立即唔敢試，比人食左張咭就煩了.....之後我地行左去離酒店路程約十分鐘的怡景中心城，呢個商場裡面有間超大型的兒童遊戲中心，之前上網睇過要入會增值咁玩，但一入就洗成千蚊！咁我當然唔會啦，所以亦要避開唔好比佢兩個見到，不過商場內有D玩具車可以坐上去自己周圍駕，信信一見就猛話：「車車！車車！」家姐都好想坐，其實我見20蚊玩8-10分鐘，都有諗住比佢地玩既，不過爸爸似乎無所動容，所以算了，帶佢地落到地下剛好有人表演下，又睇下，行了一陣為免不必要的洗費都係返酒店了！還未夠鐘開始食自助餐，諗住上去天台花園行下，點知工作人員佈置緊無咩好睇，返房放低架BB車就去食飯了！自助餐係今個旅程的重點項目，係呀，美食之旅梗係食重要過景點啦，哈哈！我地和同事一家四口一齊坐，大家的小朋友都差不多年紀，照顧好佢地自己都快D食啦！食物款式方面都算OK既，不過我覺得佢既海鮮就好似唔夠新鮮，拎返黎既長腳蟹都唔凍既，感覺似放在室温一段時間，雖然佢明明係放在冰上面，食落感覺也不夠新鮮，另外D蝦都係一樣，其他海鮮都係差唔多，至於生蠔係要另外叫的，但一見到個樣，實在強差人意！十分細隻，同樣唔新鮮！瘦都得不了，以「香格里拉」呢個品牌黎計，佢呢PART海鮮真係差到無朋友.....另外壽司/刺身都係一般，在大陸我覺得食呢D都唔係太穩陣，食過D海鮮更加唔敢食佢D刺身，好似幫襯左2舊我無食了.....還是食熟食吧，選擇款式一般，味道都唔錯。可以即場自己揀串燒材料，連埋每張枱上面有既「號碼籤」交低比佢，等一陣就自然有人送埋枱。現場有自助式既飲品(汽水/果汁)、湯和糖水，另外甜品和麵包櫃都有相當選擇，雪櫃加top Up、朱古力噴泉等都有...總括黎講除了海鮮和刺身類，其他都OK啦！不過如果係為左自助餐而專登上去呢...我會建議都係在香港食好D啦！
食飽飽就返房啦...點知好搞笑地我地無意間將門咭鎖左入去，因為我地開門拎D嘢比同事，剛巧同剛才同枱的同事家庭原來係隔離房，企係門口傾傾下又唔知點解閂埋左門，結果唯有一齊入去去同事間房度坐，順便打落去reception求救。由於信心媽的普通有限，想講「鑰匙」唔識講，諗住六星級酒店應該聽得明英文，於是我轉英文CHANNEL，但原來係溝通唔到的，最後我老公衝番落下諗住找領導姐姐幫下手，搞左一陣終於有門咭入房了！(後來我發現根本唔應該講「鑰匙」，講「房咭」咪簡單得多囉....終於有覺好瞓了！
