我地行呢個係馬鞍山郊野公園上既昂平，並唔係昂坪360嗰個呀！
點解話再戰呢？話說2018年年頭，我地跟信心媽公司同事都去過一次，嗰次既活動係行昂平加馬鞍山郊嘢公園燒烤，我地跟住同事由郊嘢公園出發，連埋朋友我地係三大三小，行得慢，同事們也不等我們了，結果我地自己好耐都未到(我諗至少45-75分鐘)，好懷疑係咪行錯路，去到一個位問途人，佢話仲要行一個鐘！！😨咁我地梗係立即回頭是岸啦！唔係真係落唔返黎！😥呢次失敗咗之後，我一路都唔敢自己再去，諗住等人帶就一定無錯，不過宜家限聚令又唔可以約人，結果，我地再上網睇清楚條路同埋問識路既朋友，就一家四口再挑戰！！
🔔出發點好重要
當年我D同事其實係由恒安站出發行上山，到左郊野公園然後再向上行。但我坐過的士上郊野公園知道嗰條斜路都唔嘢少，如果由我地屋企行上去至少都個幾鐘，咁佢地都唔會再行得郁，所以我已經諗住坐車上去，坐得車就梗係坐到去馬鞍山村，而不是郊野公園落車啦！因為由郊野公園出發到馬鞍山村其實都一段路，我地當年就係行埋呢段所以已經用左好多時間和體力，今次就梗係知訂啦！😝
最簡單梗係由屋企坐的士直上，不過最後又諗住都係慳少少啦，去坐村巴NR84，呢架村巴一個鐘先得一班，我地原本剛好趕到時間，點知.....無位了...😮其實我都記得呢架車係好容易爆的，所以唔早D到排隊應該都上唔到，結果...我地都係要轉的士.....由新港城到馬鞍山村大約40幾蚊，記得坐綠的呀！
落車位置
的士落車位置有個小涼亭，亦是分岔路了，一邊有指示牌寫著去昂平(留意！佢寫住半小時呀！😑)另一邊應該係入馬鞍山村，可以去鞍山探索館。老公話其實行入村都得，不過既然指示牌指那邊，我地就信佢啦！
路段其實都平坦易行，沿途可以經過一個荒廢了的鐵礦場(係唔會有指示的，要識路先會咁轉入草叢)，上次老公帶我地入過去，會見到有個礦洞口咁囉，同埋話附近的石頭會有磁力。我地今次無入啦，把握時間上山。⛰
基本上都一條路唔會走錯，行行下就會見到D舊村屋，就係剛才另一條路入馬鞍山村，係有條樓梯可以駁回我地這條路，所以其實一開始真係兩邊都行得。繼續沿著大路向上，暫時都係好易行，不久開始聽到有D流水聲，行左一段樓梯之後，就黎到呢個地方。
呢個係一個好好既休息位置🌳，有樹蔭和流水，好多大石頭比你坐下，不少人會在此休息和進食補充體力，溪水好清見到好多「水較剪」呢！我地上次就係行到呢度然後決定折返，而家諗返都覺得呢個決定極之正確！😹因為....好戲在後頭！
我地也在此休息一會，老公帶了撈魚仔的工具來諗住可以玩下，不過魚就好似無乜，係回程再經過時仔細睇先見到。休息過後我地就繼續上山，向昂平進發！接下來係一連串的樓梯，之前見過有人寫呢度有700級！我覺得都有，我地應該差不多行多20分鐘先到頂。(中間都再休息左一陣)
一路向上，終於行到黎大家一直講的涼亭啦！😇
由涼亭出發，向指示牌的「大水井」方向行多10分左右已經到啦！
行到差不多頂見D人就唔行大路直踩入草地上，我地又跟住，轉眼間，一片超美麗的風景和西貢景色就在眼前啦！😍😍😍
終於完成心願上到昂平啦！
其實現場都好多人來郊遊，不過地方都好大，影完相我地就揾個有樹蔭既放下行裝，這裡的確唔係太多樹蔭位，不少人會帶埋帳幕黎，還有帶埋狥仔一齊來玩的，當小朋友好興奮話要放風箏時，就見到....
可能今日天氣好，我地逗留既幾小時裡，都見到好多架飛出去，最高紀錄同時天空中有超過十架滑翔傘在飛呢！聽聞比千幾二千蚊都可以玩的，不過我諗唔係即場報名掛😶
我地在這裡野餐、休息、放風箏，可惜我地隻風箏可能太重，唔係太飛到，見人地可以放到好高的....
面向住「大金鐘」，見到上面條路都好多人，細佬猛話要上去，我梗係.....
幫佢唔到😆😆....唔知上去要再行幾耐呢....
呢到本身仲有個昂平營地專比人露營，不過因為疫症而家都封住左。而按指示牌，營地旁邊係有個洗手間的，信信話急就唯有帶佢去啦。政府係連呢個洗手間指示都用膠條封埋，唔係剛剛聽到人講我都唔會知，雖然營地封住，但我地為左去廁所就照行入去啦....但原來所謂廁所並唔係大家平時見到郊野公園嗰D咁既，佢只係一間四塊板圍住同中間有個洞既地方...恐怕裡面會好多蚊，所以我還是叫信信去淋花好了....😥
我在諗，咁現場咁多人其他人點解決呢？我又真係見唔到其他廁所....小朋友就話就地都得啫...大人女士咁點？又好彩可能流多汗，我幾個鐘都無呢個需要😆老公話所以要帶個帳幕後裡面解決囉.....O...我完全明白了....💦
行左大半日，我地4點左右就回程下山，都開始多人走，下山永遠覺得比上山快的，看看NR84的班次，以為趕唔切5點那班，最後其實行快2步已經到，今次我地就行落馬鞍山村諗住總站上車。
不過由於行山人士眾多，我地再度遇上無位坐既問題。因為司機留了4個位給中途會上車的長者，我都贊成呢個做法。不過司機又好好人見我地咁慘，最後佢讓出了兩個住比我地，爸爸就犧牲自己，比我地三個逼埋坐。司機都比老公坐到出路口，睇下係咪真係有老人家，結果都係，咁爸爸就唯有下車自己行番出郊野公園睇下點啦...最後佢都係同其他行山人士一齊行落山回家，又行多一小時，辛苦哂！🙏
所以，如果想坐村巴走的話，一定一定要預早去排隊呀！💡💡
好開心的一天，期望下次再玩過！😙😙😙
P.S. 上網揾資料時見有D內容一致，有個直情話家樂徑上，完全錯哂！❌❌❌大家跟番我以上指示先啱呀！
沒有留言:
張貼留言