阿女平時好唔鍾意食肉，唯獨食牛涮鍋就會狂食，今晚又去滿足下大小姐的胃口，當然老公一向都係任何放題的fans,而信信小鮮肉亦是開始有食力的新力軍！
不枉我遠赴大埔食呢間稻八，佢有$158-$368六個不同價錢的選擇，當然價錢越貴可選的食物越多！
我們就揀左$298餐，有澳洲M6和牛、海鮮盛盒、刺身、美國安格斯牛小排、牛肉、羊肉、雞肉、炸物等，120分鐘任食仲包沙律吧、任飲和雪糕，所以絕對係挑戰眼闊肚窄的極限！！
同埋，佢仲有一樣好抵既係，小童及長者只收半價！平時既放題都唔會平到半價咁平所以對於帶小朋友既人黎講，又可以慳番一截啦！就算唔係半價，佢都有早食/夜食優惠，85折呀！時間啱的話都慳唔少架！
揀左餐之後就是揀湯底，standard都有8款，但見另外個牌有兩款特別湯底：冬陰功毛蟹湯或芝士奶蓋！！真係未試過！其實都好想試冬陰功不過小朋友應該唔得，就揀芝士奶蓋！一鍋白白的湯底送上，起初還有些白色粉末，一端上已經聞到好香的牛奶芝士味！正！
店員一開始亦自動會把M6和牛、金錢展、羊、豬、雞、牛粒等肉送上，等緊個鍋滾嘅同時，我哋就剔左一啲刺身，選擇都算多，大部份都好新鮮，前後食咗兩轉。
湯滾咗就第一時間試吓啲牛，M6和牛真係好好味，好腍，相比其他普通牛,真係唔同d!物超所值！其他都唔差，羊都好有羊味、雞又夠滑。
另外個海鮮盛盒都值得一讚，裏面有青口、蝦、墨魚咀、北寄貝、蟹柳、蜆、蠔等等，特別要讚下個蠔，我平時唔係特別鍾意食，但係呢個真係好鮮味，搞到我忍唔住要encore，好彩係任食啫！
呢度另一個特色，就係可以自己做天婦羅，有好多串串吉好俾你，例如燒賣、秋葵、火腿、丸、甜番薯等等，只需要自己沾漿上粉，然後放落炸爐裏面炸就可以，仲有好多味粉比你落。不過炸得好唔好就講你個人技術，不過玩味十足！
自助吧配料都有好多，不過真係食唔到咁多野，反而我追加左花膠、蝦滑同墨魚滑，都唔錯啊！
最後當然唔少得食甜品，佢有一個櫃放咗雪米糍同埋韓式雪條，另外門口仲有個雪櫃可以拎Dreyers同Häagen-Dazs，不過呢個櫃會上鎖，係最後憑單換領，每人一杯，跟住我哋就好開心咁食住雪糕走人！
越來越鍾意來石門覓食，因為選擇好多，即使呢間冇位，都仲有第二、三、四....間可選擇。
今日就食Su Casa，記得去年父親節同老公嗰邊幾家人來食，印象都唔錯，所以今晚又嚟過，吸引嘅地方其實佢係一間children-friendly嘅餐廳，除咗有三款兒童餐可選，佢仲提供畫紙俾小朋友填色打發時間，到最後仲有個驚喜添！
阿仔一入嚟見到有兒童餐就指住話要食，所以嗌咗個兒童A餐（ $68 ）俾佢，家姐就要個C餐（$68），兩個餐都有胡麻沙律、一個主菜（分別是茄汁粟米意粉加魚形魚餅，或者芝士通心粉加生果粒）和橙汁。
份量都剛好，沙律有菜和車厘茄，主菜方面，A餐嘅蕃茄粟米意粉好味，蕃茄醬濃烈，個魚型魚餅都好味。而C餐的芝士通心粉都有好多芝士汁， creamy好味，不過生果粒略嫌少左d，相比A餐個魚餅就冇咁吸引。
小朋友有得食有得玩，我同老公梗係開心撐枱腳，晚餐有Set（平均$68至$168 ，仲可以有top up)，不過我哋冇揀，想食好少少，先叫咗四隻生蠔，佢呢度啲生蠔做買一送一，店員推介Poesie($65兩隻）和Majestic（ $68買一送一），兩款都來自法國，店員教我地先食前者，呢款相對鮮甜，而後者相對海水味較重，兩款都好好味啊！
食完生蠔，仲有一個前菜「意大利帕馬火腿配哈蜜瓜」（$88），有六件咁多，中間仲有少少沙律菜，不錯不錯。
餐湯有小多士附送，忌廉湯都好正！
飲完餐湯之後就上主菜分別係「鴨肝野菌扁意粉」（ $158 ）同埋「燒原隻去骨美國野春雞」（ $178 ）。
個意粉啲汁好creamy，有啲菇同埋鴨肝，開頭以為係鵝肝但到埋單嗰下睇到張單先知原來係鴨肝，哈哈，對我來講都沒什麼分別。鴨肝切粒，容易入口，唔會太濃味。
燒春雞個皮好脆，面頭灑左一啲好似椒鹽嘅粒粒，連伴碟嘅薯仔都好似煎過，相當惹味。雞皮好脆但略咸，不過連埋啲雞肉食又中和返幾好。除咗薯仔伴碟，仲有西蘭花和蘆筍，蘆筍鮮嫩好味呀！
我們有叫到杯餐飲，係菠蘿有機奇亞籽綠茶，健康之選又不失美味！奇亞籽加上菠蘿果肉，好有口感，又唔會太甜，值得一試！
美味嘅晚餐點少得甜品呀，我哋叫咗一個「燴車厘子金寶脆脆配雲呢拿雪糕」（ $68 ），個賣相好靚好吸引，特別之處在於杯頂有塊粉紅色嘅餅做蓋，店員叫我地先用個匙羹篤開個頂，聞吓裏面有香噴噴嘅煙飄出來，成件事好夢幻，又好好玩。跟住就可以將粉紅色餅敲碎連埋其他雪糕和金寶脆脆一齊食。
裏面有好多粒燴過嘅車厘子，仲有士多啤梨和藍苺，加埋脆脆和雪糕，真係好好味啊！
臨走之前仲有個小驚喜，原來每個兒童餐都會獲發一張抽獎券，店員拎左個小小嘅扭蛋機過來，比小朋友用假token扭蛋，係一件小小嘅玩具，雖然價值唔多，但係睇到老闆嘅心思，勁讚！呢餐飯大人細路都好開心，真係估唔到石門有呢間隱世親子餐廳。
臨走喺門口見到張卡片，先知原來有兩間分店在銅鑼灣，有機會都可以去睇下。
