晚餐時段由6:30開始，我們準時排隊入座，小朋友見到玩樂設施已經非常興奮，一放低袋就衝去玩。餐廳有一半位置係玩樂區，九成九的遊樂設施都需要脫鞋進行，先脫鞋後噴消毒藥水洗手就可以入去。
超大波波池當然是大樹先生的最大特色，據聞波波顏色仲會久不久轉（更加證明佢地會換波清潔），今期是浪漫的紫色大海。小朋友跳進波波池玩得興高采烈，還有滑梯增加趣味！波波池旁邊是有網陣，有幾個吊著的沙包供小朋友攬住玩。
除此之外，還有很多其他玩意，積木類、煮飯仔類、畫畫類等，又有靚衫可以扮公主！仲好細心的設了一個2歲以下區域，以免bb被哥哥姐姐撞到。
至於另外1%唔洗除鞋既區域係玩水的，小朋友要先穿保護衣防濕，然後就可以去「釣魚」。我諗好少親子餐廳肯玩水，而且佢地就寫明水質達食用級數，家長可以放心！餐廳都好注重衛生，有小朋友忘記除鞋衝左入遊戲區，職員亦立即抱佢出嚟，而用餐位置就必須穿鞋。
心心和信信當然玩得好開心，我同老公更開心係可以放下佢地一陣享受一頓晚餐。別以為親子餐廳只着重玩樂啲食物就唔得，呢度都給我有點驚喜。
我哋叫咗一個「照燒頂級銀雪魚配黑松露薯蓉」（ $328 ）、「慢煮特級牛柳伴鵝乾配黑松露醬燒肉汁」（套餐$316 ），另外叫咗兩個兒童餐，「大笑貓貓配煎魚柳」（ $158 ）以及「螃蟹寶寶配照燒雞扒」（ $158 ）。
我個銀鱈魚相當好食，魚柳都大件，煎得香、魚肉柔嫩又滑溜，如果黑松露薯蓉有好香黑松露味，真正色香味俱全！
老公叫嘅牛柳加鵝肝都好大塊，食咗一啖牛柳，肉質好腍，估唔到呢度啲扒咁好，真心驚喜！佢都有黑松露薯蓉，另外仲有少少時菜，所以份量俾我嗰個大。佢亦upgrade變套餐，有埋沙律同湯，羅宋湯偏譚，可能就番小朋友口味，沙律有埋蟹籽味道幾好。
兒童餐當然賣相好吸引，一份係螃蟹造型，另一份係貓貓造型，有主菜同湯同一份水果，味道都OK，相對健康。
另外我哋都叫左四杯特飲，分別係草莓香蕉、紫薯鮮奶、蘋果菠蘿汁，同埋一壺熱嘅水果茶。
特別想讚下個水果茶，果香味濃郁，打開壺蓋裏面見到有椰果、藍苺、蘋果、菠蘿、檸檬等，飲落去甜甜地又有茶味，而且好大壺可以飲好多杯，好味又好抵呢！
其他特飲賣相好靚，味道全部都幾好，甜而不漏！
除咗玩樂設施，基本親子餐廳設施包括BB櫈、BB餐具等當然一一齊全，廁所的廁格易容親子廁板， 十分細心。餐廳內仲有一間房可以揀開，相信係舉辦生日會用，不過現場見到大廳都有小朋友切蛋糕，唔知使唔使另外加切餅費呢？
沒有留言:
張貼留言