BB有便便了？

周不時聽到有家長因為小朋友便秘而喊救命，其實心心開始轉固體食物既時候，都遇過呢個問題，咁我地有咩解決方法呢？

1.      飲水

心心是全人奶BB，所以佢頭半年真係一滴水都未飲過！(諗落真係覺得好神奇！)到佢開始食固體食物，就要慢慢比水佢飲，可能起初飲既份量較少，所以佢就出現便秘既情況，見佢poo poo痾到喊哂，真係心到痛埋，所以唯有盡量比多D水佢飲，不過由於飲慣甜甜地既奶奶，對於無味既水，佢就真係不太感興趣，但我地又唔想因此而比果汁嗰D佢，所以真係照比水，或者家長都可以考慮在水中加入檸檬或水果浸住，等D水有些少味道會好飲D！但我就真係唔建議直接用果汁代替，咁只會令佢日後更多唔鍾意飲水。

2.      通便食物

除左飲水，仲有好多食物都會幫助排便，乳酪、西梅、火龍果和香蕉等，不過記得香蕉要揀熟的，原來生的香蕉會令便秘更嚴重，我地都係錯過先知！

3.      按摩

呢一招我地覺得非常有效，就係幫BB在肚仔上按摩，記熟口訣：「1 0 = I LOVE U」！

l   先把BB平躺在舒服環境，可以就除開衫仔開始按摩

l   用手在BB肚臍上的位置開始向下按，就像寫一個亞拉伯數字1

l   順時針打圈，像寫個0字

l   在肚臍附近由左至右打橫按過去，像畫 = 符號

l   再由上至下劃一次，寫「I」

l   由左至右打橫劃過去再向下，像寫個倒轉的L，目的是幫助大便蠕動，記住別要把方向搞錯，否則便便會被你推回去啊！

l   根據大腸位置，由下至上再轉右再向下，像寫個倒轉的U，同樣幫助把便便推向肛門位置。

l   每個動作可以重覆數次才做下一個動作，毋須過份大力，可以一邊做一邊望著BB唱歌或傾計，BB會好開心啊！

很記得有次心心在努力便便，痛到喊哂，我和爸爸一邊幫佢按肚仔一邊叫佢加油，感覺真的像等待BB出世一樣！最後「BB有便便了！」終於明白這句說話背後的快樂了！不過感恩這段便秘的時間不是維持了太長，之後習慣了固體食物，慢慢亦不再出現了！反而媽媽自己有時也會幫自己做肚仔按摩呢！