想輕鬆進入固體食物過渡期？

BB可以開始進食固體食物，是令父母十分興奮的事！證明BB的成長又邁進一大步！想BB食得好、食得開心，當然要循序漸進，由單一食物逐點嘗試到混合不同食物，有關注意事項可能各位新手父母都從健康院、育兒書或網上得到了資訊，所以我純粹想分享一下自己的經驗，如何令BB和父母輕鬆過渡這時期。

1.    配合環境：拿開玩具、關掉電視，都讓BB可以更專心進食，如果習慣了對著電視和玩具才食飯，到他長大將會是另一大問題。同時，將BB安全地放在食飯椅上，可以讓他習慣坐定定，當然我明白一些大BB已經學會自己逃脫，但至少從小培育習慣，到他大一點時，也會先食飽才爬出來！

2.    吸引力：相信大家都懂得用不同顏色、形狀的食物來吸引BB，不過有時真的很忙碌又何來時間整得靚靚？或者工人姐姐照顧的話，更難以控制。那麼，可以考慮用美麗的餐具吸引，選擇BB喜歡的顏色/圖案餐具，但我不太建議用很多不同款式，應該讓BB習慣這個碗就是用來載他的食物，讓他一見到就知道是開餐時間了！

3.    自己嘗試：我贊成讓BB接觸食物，坊間有傳興用BLW的方法，我的第二胎也是用這方法，只要父母了解明白後，可自行選擇是否跟從。但不論是不是BLW，讓BB用手接觸食物，不單可刺激他的觸感，也可能會增加他的食慾呢！如果BB嘗試用手或用匙去進食，不要禁止他們，即使他們會弄到周圍污穢，也盡量給他們空間，也不要在進食途中不停幫他們抺嘴抺手，如果你食飯途中不停被人騷擾，你也不想再食吧！

4.    放鬆心情：想BB愉快進食，有父母的陪伴當然最好，但父母也要放鬆心情，如果太緊張他吃的份量，BB也會感到壓力。餵食時不妨面帶笑容地與BB傾偈，告訴他在吃甚麼食物、多點讚賞他，BB就會食得更開心！時間配合到的話，我亦贊成一家人與BB共同進食，讓他經驗到一家人一起食飯的樂趣，模仿你們食飯的動作，而當他聞到你們的飯餸香噴噴，他會更加想吃你的食物呢！(這個可能會衍生另一個麻煩了！哈哈！)

知道部份BB不肯進食的確令父母很頭痕，盼望以上分享能給你一點啟示，讓你們和BB也能輕鬆面對進食時間！

http://www.baby-kingdom.com/customer/bk/bkol/minisite2017/page.php?id=1384

初探清新地(+重遊科大)

放假去農莊玩係唔少家庭的活動，香港宜家有大大小小不同農莊，包括今日去既「清新地」！

聽就聽左一段時間，今次因為玩遊戲贏左四張免費門票，所以特登安排了一天「重遊科大+初探清新地」活動！要特登安排係真係無誇張，因為逢星期六下午心心都會參加教會團契，而爸爸也要帶領中學生的團契，所以星期六幾乎是不用想的！(偶爾請下假囉...)而星期日很多時也有教會的活動或會議要參加，所以我們要有特備節目真的要左度右度，又調下教會事奉安排等等先可以排到一個空檔期出來！好像今次原本是安排了17/9去玩，誰知臨時接拍了「廣告」，這個難得的機會當然不會推，所以唯有再調這邊，原本門票係30/9到期了，但往後的星期日也沒有空檔，很感恩農莊負責人肯讓我們1/10來，否則就沒有今次的行程了！

地標

國慶日天陰陰的，坐巴士到彩虹再轉車往科大去！這也是爸爸以前上學的路程，爸爸畢業N年也很久沒有重遊科大，今次第一次帶著兩個寶貝一遊！假期的學校人不多，首先當然與地標「火雞」個合照！然後再周圍行行，叫做讓心心感受到大學校園，然後就一齊到canteen開飯！三十幾蚊大大碟！食飽好上路！

爸爸在想當年...

科大靚海景

行番去大學門口小巴站，就會見到往「清新地」的小徑。爸爸說當年返學好像沒有見到這條「路」，沒有「清新地」的話當然沒有人會去留意這條小徑，怎想到要行去那個地方呢？話說回來，究竟清新地的主人又係如何發掘出這片地去發展呢？？

事前做足功課，深知要行的路不少，叫做食飽飽有氣有力，一開始見有路牌寫著成人步速15分鐘到達，結果呢？我們1:28出發，到達時約時1:58，足足是30分鐘....信信一直也是自己行的，沒有要抱，很好！沿路有少許平路，然後大部份是樓梯，部份路段有點窄要小心行，辛苦爸爸還要帶著BB車去行，因為我們怕信信中途要訓覺嘛！如果去清新地的朋友，盡量輕裝上路啊！對於少運動的信心媽，都行到有點攰....互相鼓勵下，我們也終於到了！

小巴站前會見到指示牌

真係路黎呀！

一入去農莊就有人來招呼我們，先讓我們在主屋坐下，分左幾張枱，每個家庭有屬於自己的枱，可以隨意將物品放下，貴重物品跟身就可以了！頭頂有吊扇，行都熱辣辣當然要抖下先。我們今日的門票係包括導賞、小盆栽製作、自製鬆餅等，其餘就是自由活動。休息了一陣，我們都急不及待要周圍看看，負責導賞的同事剛未有空，於是我們自行先往出面玩下秋千！跟住導賞開始了！明明一開始得我地一家，但後來越來多人JOIN，本來對呢D導賞無咩興趣，不過後來聽下佢講解那裡的不同植物，當識多D野都幾好啊！導賞員又問下我們知唔知呢D係咩？又比小朋友試下香茅既味道，有互動都幾好啦！

導賞員哥哥

咁大個既檸檬見過未？

打咭位

急不及待玩陣先

不過講到差不多最後就下起大雨來，大家立即走避入屋。跟住導賞員哥哥隨即準備了羅勒同大家做小盆栽，講解完之後就每人剪少少，跟住就過番對面的小屋，每人都有個小盆，自己放入泥土、羅勒小苗，然後淋水，哥哥話呢個已經好易種，仲一心諗住佢點樣開支散葉時，過左幾天我地那兩棵已先後魂歸天國...似乎我地真係無咩種野的天份...不過比小朋友玩下都開心既。

主屋內有貓貓呀！

跟住係未開始做藍莓鬆餅之前，心心話要去餵羊，所以我地就買左一札草(十蚊定廿蚊？)去餵羊，之前見人話只有一隻羊，但今日去都見到5隻羊加一隻兔，但主要係兩、三隻會過黎食，有隻大隻好惡，係咁撞開D細隻的唔比人地食，幾衰！兩個寶貝都肯餵，不過信信玩左陣就唔玩了....餵羊既位置唔係好闊，企到兩個大人左右。

餵完羊之後我地就再過隔離既小屋整鬆餅，一入去就聞到好香咁，可能係之前既人整餅既餘香....我地3個家庭一齊，都係分好枱做的，其實好簡單，基本上佢幫我地倒入適量材料，我地淨係負責搞混佢，最後揑成一個個波波咁，佢就會幫我地拎去焗，咁我地就可以洗手去玩！跟住之後先返黎拎成品。

其實3個環節每個環節都係大約20分鐘左右，之後就自由時間去玩。我地係整鬆餅期間聽到農莊的人去放羊！所以小朋友立即洗完手就衝去搵羊羊，牧羊人帶佢地去到出面任食草！小朋友就可以更近距離去睇佢地，不過叔叔話有一隻好惡，唔好搞佢，我地睇左一陣就去玩草地上的設施，由於剛剛落完雨，好多都濕左但不減小朋友的興緻。其實現場都係大既，玩完一個位又去另一個位，兒童設施唔算好多，而且部份有點舊，始終戶外日曬雨淋，不過玩下、影下相、跑下都夠時間了，係時候返去食鬆餅！熱哄哄親手做，加上玩完又餓，當然覺得好味啦！諗住食唔哂打包，後來食食下又食哂了！執好野又夠鐘走啦！

牧羊人

小橋流水後面仲有一大片草地

由於我地唔想行番樓梯上去，所以一黎就講左要去坐船，4:50PM負責人都提大家要去廁所外集合，再行條小路出碼頭。個碼頭其實係好細，唔算得上係一個碼頭，只係一個上船既位，哥哥帶我地出去，成棚人企係度等船來，遠望科大，勁大風咁等左一陣就有船到了！大家排隊上，每位$20(來回都坐共$30)，大小同價，原本話2歲以要比錢，咁我地好乖咁比左四個人錢，不過後來一個家長指住個仔問佢洗唔洗？兩歲半....跟住船家話：是旦啦....咁就免佢錢了....早之我又問句啦....

小碼頭等船中

上到船搖搖下信信好快瞓了，船家開到去一個漁排又接另一批客，所以架船都幾爆，順利去到白沙灣碼頭就走人了！總括而言，今日玩左3小時左右，(我諗來回坐車都差不多....)勉強夠玩，原本係預玩4小時的！如果選擇坐埋佢地船去，係2鐘點得一班，除非你有超過十個人就可以包架船喎....

雖然中間下雨，不過又好快停，又出陽光。整體都開心呀！不過如果唔係有免費門票，自己黎都唔平呀，網頁顯示導賞加盆栽每位$40，要加埋整鬆餅或其他我諗要過百蚊一個人，(網頁無左價錢)，一家四口加交通費，仲唔$600-700咩.....不過宜家D野係咁貴啦....

提一提，農莊內係有機種植，所以室外唔比用蚊怕水，要在室噴，我地用香茅油的，但我和心心都咬到成腳蚊爛...痕死了...大自然就係咁啦！

想睇更多資料可以到佢地網頁：
http://www.naturesharvest.com.hk/